රතන හිමියන්ගේ හෘධ සාක්ෂිය කියන තරම් පිවිතුරු ද ?

- පැතුම් රණසිංහ -

'සැබෑ' 2018 අගෝස්තු 05 කලාපය

(Link to PDF)

පළාත් සභා ඡන්දය, මහ මැතිවරණය සහ ජනාධිපතිවරණය එක පෙළට පැමිණීමට නියමිතය. ලාංකේය දේශපාලන භූමිය පුරා දශක 6 ක පටන් අත්දකිමින් සිටින ඡන්ද ගුණ්ඩු වඩාත් සක්‍රීය ලෙස ඉදිරි මාස කිහිපය තුළ දෘශ්‍යමාන වනු ඇත. එසේම එදාට වඩා අද ඡන්දදායකයා ක්‍රම ක්‍රමයෙන් තමන් සතු විය යුතු සබුද්ධික බව හිමිකරගනිමින් සිටින බවක් ද හැඟී යයි. එදා මෙන් ක්ෂණික පිල් මාරු සිදු කිරීම අද දේශපාලඥයින්ට පහසු නැත. ජනතාව සීරුවෙනි.

2015 ජනවාරි 08 දේදුණු විප්ලවයේ පාර්ශවකරුවන් අතර ජාතිකත්වයේ සංකේතය වන් වූ අතුරලියේ රතන හාමුදුරුවෝ තමන් වහන්සේට පිරිනමා තිබූ ජ්‍යෙෂ්ඨ ජනාධිපති උපදේශක ධූරය අත්හරින බව ප්‍රකාශ කළේ ඉකුත් සතියේදී ය. එසේම “වැරදි මිනිස්සුන්ට රට භාර දීලා අපි හිඟන්නෝ වගේ බලන් ඉන්නවා” යනුවෙන් උන්වහන්සේ සිදු කළ ප්‍රකාශයක් ද මාධ්‍ය මගින් වාර්තා කොට තිබුණි. රතන හාමුදුරුවන්ලා එක් වී රට භාර දුන් වැරදි මිනිසුන් කවුද ? එසේ වැරදි මිනිසුන්ට රට භාර දී හිඟන්නන් මෙන් බලාසිටින ‘රතන හිමියන් ඇතුළු අපි’ කවුද යන්න විවරණය කර ගැනීමට පසුගිය දශක දෙකේ ශ්‍රී ලංකා දේශපාලන කතාන්දරයේ රතන හිමිගේ භූමිකාව ගැන පිරික්සා බැලිය යුතුය.

ජාතික හෙළ උරුමයේ උපදේශක, රතන හිමියන්ගේ පිවිතුරු හෙටක් උදෙසා ජාතික සභාවේ විධායක සභිකයෙකු වූ අශෝක අභයගුණවර්ධන මහතාගේ හෙළිදරව් කිරීමක් මෙහිලා විශේෂයෙන් උපුටා දැක්වීම වටී. එය ඔහුගේම වචනවලින් උපුටා දැක්වීමෙන් දේදුණු විප්ලවකරුවන් අතට බලය ලබා දීමට රතන හිමියන්ලා යෙදූ කූට උපායන් කෙතරම් සාහසිකදැයි යන්න අපට සිතාගත හැකිය.

"අප අත ඉතිරිව තිබූ තුරුම්පු එකින් එක ගසා බැලූ නමුත් ඒවා දිගින් දිගටම අසාර්ථක විය. අපට හිතවත්ව සිටි එකම ප්‍රධාන මාධ්‍ය ආයතනය වූ සිරස හි අයිතිකරු වූ කිලී මහරාජා මහතා නිතර අතුරලියේ රතන හිමියන් සමග දේශපාලන පෙළගැසීම් පිළිබඳව අදහස් හුවමාරු කර ගත්හ. ඉන් එක අවස්ථාවකට මමද රතන හිමියන් සමග ඔහු හමුවීමට ගියෙමි. එහිදී මැතිවරණ ව්‍යාපාර හා සිරස ක්‍රියාකාරකම් පිලිබඳ සරල විවේදනයක් මම ඉදිරිපත් කළෙමි.

එහිදී එම සාකච්චාවට එක්වූ චන්දන සූරියබණ්ඩාර මහතා ඉදිරිපත් කළ එක් අදහසක් මගේ සිත් ගත්තේය. ඔහුගේ නිරීක්ෂණය වූයේ රාජපක්ෂ පිල සැමවිටම ඉදිරියෙන් සිටිමින් ප්‍රශ්න ඇතිකරන අතර මෛත්‍රී පිල කරන්නේ ඊට ප්‍රතිචාර දැක්වීම පමණක් බවයි. මෛත්‍රී පිලත් රාජපක්ෂ පිලට එරෙහිව අලුත් අනපේක්ෂිත තුරුම්පුවක් ගැසීම යෝග්‍ය බව ඔහුගේ අදහස ව්ය. එම යෝජනාව ඉතා වැදගත් වූ අතර අපි ඒ සම්බන්ධයෙන් ගැඹුරින් සාකච්චා කළෙමු. අපි අලුත් සැලැස්මක් සම්පාදනය කළෙමු."

"මහින්ද පිල හා කොටි ඩසස්පෝරාව අතර යම් අවබෝධයක් ඇතැයි අපට හැඟිනි. එම අවබෝධය කෙබඳු විය හැකිදැයි අපි ලියවිල්ලකට ගතිමු. එම ලියවිල්ල සම්පාදනය කිරීමේ විශිෂ්ඨ වැඩ කොටස කලේ ශිරාල් ලක්තිලකයන්ය.

ඊට දින දෙකකට පසු එය බැසිල් විසින් රුද්‍රා වෙත යැවූ ඊමේල් ලිපියක් ලෙස ඊ නිවුස් වෙබ් අඩවියේ ප්‍රකාශයට පත් වී තිබිණි. එම ඊ නිවුස් පළ වූ ලිපිය සැබැවින්ම බැසිල් රාජපක්ෂයන්ගේ ඊ මේල් ලිපිනයකින් රුද්‍රකුමාරන් නැමති කොටි ඩයස්පෝරාවේ වර්තමාන නායකයාගේ සැබෑ ඊමේල් ලිපිනය වෙත ගොස් තිබිණ. මෙම ලිපිය පසුව රාජිත සේනාරත්න මහතා විසින් මාධ්‍ය සාකච්චාවක් පවත්වා රටට හෙළිකරනු ලැබීය. එය රටේ සිංහල ජනතාව අතර බරපතල තිගැස්සීමක් ඇතිකළ බව අපට පසුව හැඟිනි. මෙමගින් මහින්දගේ දේශප්‍රේමීභාවය පිළිබඳ බරපතල ප්‍රශ්නාර්ථයක් සිංහල සමාජය තුල ඇතිවිය"

ඒ උපුටා දැක්වූයේ අශෝක අභයගුණවර්ධන මහතා ‘යුග පෙරළියේ’ තැබූ සටහනකි. අද එක් එක් තැන්වල දේශනා පවත්වමින් ‘වැරදි පුද්ගලයන් හට රට භාර දී අපට හිඟන්නන් වගේ ඉන්නට සිදු වී ඇති’ බව ප්‍රකාශ කරන්නේ මේ ආකාරයෙන් ව්‍යාජ තොරතුරු ජනතාව හමුවේ තබමින් ඡන්ද දායකයා නොමග යැවූ රතන හිමියන්මදැයි වරෙක සිතේ.

වර්ෂ 1962 දී මාතර අතුරලිය ග්‍රාමයේ විසූ සැදැහැවත් බෞද්ධ යුවලකට දාව සත් දෙනෙකුගෙන් යුතු පවුලේ බඩපිස්සා ලෙස උපන් රංජිත් ගමගේ කුල දරුවා 1976 දී පූජ්‍ය අතුරලියේ රතන නමින් බෙලිඅත්ත අගුල්මඩුව විහාරස්ථානයේදී පැවිදි දිවියට ඇතුළත් විය. අම්බලන්ගොඩ රන්දොඹේ පිරිවෙනින් සහ පානදුර සද්ධර්මාකර පිරිවෙනින් පිරිවෙන් අධ්‍යාපනය ලැබූ තරුණ අතුරලියේ රතන හිමියන් පසුව උසස් අධ්‍යාපනය සඳහා පේරාදෙණිය විශ්වවිද්‍යාලයට ඇතුළත් විය. එකල උන්වහන්සේ පවසන පරිදි මාවෝ ගේ චීන විප්ලවය උන්වහන්සේ දුටුවේ බෝධිසත්ව ක්‍රියාවක් ලෙසය. 87-88 ධවල භීෂණ සමයේ අත්අඩංගුවට පත් වූ පේරාදෙණිය සරසවියේ සිසුන් නිදහස් කරගැනීම සඳහා පැවැත්වූ සාකච්ඡා වලට ශාස්ත්‍ර පීඨයේ ශිෂ්‍ය නායකයෙකු ලෙස රතන හිමියන් දායක විය.

1991 දී එවකට වධාකාරයෙන් නිදහස්ව පැමිණි චම්පික රණවකලා සමඟ සම්බන්ධ වූ අතුරලියේ හිමියන් ජනතා මිතුරෝ නම් සංවිධානය පිහිටුවගත්තේ ය. 1992 දී වාද්දුව ප්‍රදේශයේ පන්සලකදී චම්පික රණවක, මාලින්ද සෙනෙවිරත්න, ජානක බණ්ඩාර යන අය සමඟ අතුරලියේ රතන හිමියන් අත්අඩංගුවට පත් වන්නේ ‘රටවැසි පෙරමුණ’ නම් දේශපාලන පක්ෂයක අභ්‍යන්තර සාකච්ඡාවක් පවත්වමින් සිටියදී බව කියනු ලැබේ. ඉන් පසුව 90’ දශකයේ මැද භාගයේදී ජාතික සංඝ සභාව පිහිටවූයේ ද අතුරලියේ රතන හිමියන්ගේ මැදිහත් වීමෙනි. පසුව එය පවත්වාගෙන යාමට නොහැකි තැන එල්ලාවල මේධානන්ද හිමියන් මූලිකත්වයේ තබා සංඝ සම්මේලනය පිහිටුවන ලදි.

2000 වසරේදී රතන හිමියන්ලා, චම්පික රණවකලා එක් වී සිහළ උරුමය පිහිටවූ අතර ඊට ලැබුණේ ඉතා අඩු මහජන අකර්ශනයකි. 2004 ගංගොඩවිල සෝම හිමියන්ගේ හදිසි අපවත්වීම සමඟ ගොඩ නැගුණු ජාතික හෙළ උරුමය අතුරලියේ රතන හිමියන්ගේ දේශපාලනයේ කූටප්‍රාප්තියයි. 2004 දී ජාතික හෙළ උරුමය නියෝජනය කරමින් කළුතර දිස්ත්‍රික්කයෙන් පාර්ලිමේන්තුවට තේරී පත් වූ රතන හිමියන් ජාතික දේශපාලනය තුළ දැවැන්ත ප්‍රතිරූපයක් ගොඩ නගා ගත්තේය. කලින් තමන්ට හමුවීමට අවස්ථාවක් පවා නොදුන් එවකට ජනාධිපතිනිය වූ චන්ද්‍රිකා කුමාරතුංග මැතිණිය  අවසානයේදී තමන් හමුවීමට පැමිණ මධ්‍යම රාත්‍රියේ සිට අලුයම දක්වා සාකච්ඡා පැවැත් වූ බව රතන හිමියන් වරෙක ප්‍රකාශ කර සිටියේ ය. එහිදී චන්ද්‍රිකා මැතිණිය හෙළ උරුමයේ භික්ෂු මන්ත්‍රීවරුන්ට තිලිණ ලෙස ලබාදුන්නේ ජංගම දුරකථනයන් ය. අතුරලියේ රතන හිමි ඇතුළු පිරිස්වලට එකී බලය ලබාදුන්නේ මෙරට ලක්ෂ ගණනක් වූ ජාති මාමක ජනතාව බව අමුතුවෙන් සඳහන් කළ යුතු නැත.

2010 මහ මැතිවරණයට රතන හිමියන් තරඟ කළේ එක්සත් ජනතා නිදහස් සන්ධානය නියෝජනය කරමින් ගම්පහ දිස්ත්‍රික්කයෙනි. මේ වන විට බොහෝ බලවත් දේශපාලන නායකයින් හට භාවනාව පුහුණු වීමට පවා රතන හිමියන්ගේ මගපෙන්වීම් අවශ්‍ය වූ බව කියනු ලැබේ. එවන් පුද්ගලයන්ට සුව පහසු ලෙස භාවනායෝගී වීමට රතන හිමියන්ගේ රාජගිරියේ පිහිටි සිරි සදහම් සෙවණ ඉතා යෝග්‍ය ස්ථානයක් වන්නට ඇත.

2010 පාර්ලිමේන්තු මැතිවරණයෙන් පසුව වසර 3ක් පමණ ගත වන විට අද රජය විවේචනය කරන ආකාරයෙන්ම එදා පැවති රජයද තැන තැන විවේචනය කිරීමට රතන හිමියන් ක්‍රියා කළේ ආණ්ඩුවේ මන්ත්‍රීවරයෙකු වශයෙන් සිටියදීම ය. එම විවේචනයන්ගේ කෙළවර වූයේ චතුර සේනාරත්න මහතා ලේඛම් ධූරයේ පිහිටුවමින් අතුරලියේ රතන හිමියන් විසින් ‘පිවිතුරු හෙටක් උදෙසා ජාතික සභාව’ බිහිකර ගැනීමයි. රතන හිමියන්ට සේනාරත්න පවුල සමඟ ඇත්තේද අපූර්ව ළෙන්ගතු බවකි. 2016 දී ‘රාජිත සේනාරත්න පදනම’ සංස්ථාගත කිරීමේ පනත් කෙටුම්පත පාර්ලිමේන්තුවට ඉදිරිපත් කළේද රතන හිමියන් විසිනි.

2014 නොවැම්බර් 09 දා අතුරලියේ රතන හිමියන් මාධ්‍ය හමුවේ පැවසුවේ ශ්‍රී ලංකා නිදහස් පක්ෂයේ ලොකු දත් ද ආණ්ඩුවෙන් ගැළවීමට නියමිත බවයි. ඒ වන විටත් මෛත්‍රිපාල සිරිසේන මහතා මහින්ද රාජපක්ෂ රජයේ ඇමතිවරයෙකි. එසේම ශ්‍රී ලංකා නිදහස් පක්ෂයේ ලේකම්වරයා ය. ඒ අනුව පැහැදිලිවම මෛත්‍රිපාල සිරිසේන මහතා පොදු අපේක්ෂකයා වන බව දැන සිටි ස්වල්ප දෙනා අතුරින් රතන හිමියන්ද කෙනෙකි. චන්ද්‍රිකා කුමාරතුංග, රාජිත සේනාරත්න, රනිල් වික්‍රමසිංහ, මංගල සමරවීර වැනි අය එම සැළසුමේ අනෙකුත් සම්පත් දායකයන් වෙති.

යහපාලන රජය යටතේ ස්ථාපිත වූ 19 වන ආණ්ඩුක්‍රම ව්‍යවස්ථා සංශෝධනයේ ප්‍රධාන යෝජනාවලිය සකස් කළේද අතුරලියේ රතන හිමියන් ය. කෙසේ හෝ අද වන විට අතුරලියේ රතන හිමියන් පාර්ලිමේන්තුව නියෝජනය කරන්නේ එක්සත් ජාතික පක්ෂ ජාතික ලැයිස්තු මන්ත්‍රීවරයෙකු ලෙසය. පසුගිය වසර දෙකක කාලය පුරාවටම උන් වහන්සේ ලොකු පිම්මක් ගැන පුංචි පුංචි ඉඟි ලබා දෙමින් සිටී.

2015 ජනවාරි 08 ජනාධිපතිවරණයෙන් පසුව එම මස 21 දා මාධ්‍ය හමුවේ රතන හිමියන් ප්‍රකාශ කළේ වත්මන් ජනාධිපතිවරයා සහ නව රජය ජනතා අභිලාෂයන් ඉටු නොකළහොත් ඔවුන්ට එරෙහිව පාරට බහින බව ය. කෙසේ වෙතත් උන්වහන්සේ 2017 ජනවාරි මාසයේදී ප්‍රකාශ කළේ අරමුණක් නොමැති දේශපාලන කෑගැසිම් වලට මේ රට වෙනස් කළ නොහැකි බවත් තමන් කිසි විටෙක විපක්ෂයට නොයන බවත් ය. 2016 වසරේ සැප්තැම්බර් 24 දා පැවැත් වූ ජාතික හෙළ උරුමයේ 13 වන මහ සමුළුවට රතන හිමියන් සහභාගී නොවිය. එහිදී එතෙක් උන්වහන්සේ එම පක්ෂය තුළ දරණ ලද සභාපති තනතුරෙන් ඉවත් කරන ලදි. 2017 මාර්තු මාසයේදී රතන හිමියන් පැවසුවේ බුද්ධි අංශවල නිළධාරීන් අත්අඩංගුවට ගැනීම පිළිබඳව ජනාධිපති හෝ අගමැති නොදන්නා බවයි. යහපාලන රජයේ නව ව්‍යවස්ථා යෝජනා තුළින් ජාතික සමගිය සහ සංහිදියාව ගොඩනැගීමට ඇති ඉඩකඩ සම්පූර්ණයෙන්ම ඇහිරෙන බව රතන හිමියන් ප්‍රකාශ කළේ 2017 ඔක්තෝම්බර් මාසයේදී ය. මේ වසරේ මුලදී අගමැතිවරයාට එරෙහිව විශ්වාස භංගය ගෙන ආ අවස්ථාවේදී රතන හිමියන් අගමැතිවරයාට විරුද්ධව පාර්ලිමේන්තුවේදී අදහස් ප්‍රකාශ කළේය. කෙසේ නමුත් එහි ඡන්ද විමසීම මගහැර සිටීමට උන්වහන්සේ පරෙස්සම් වී තිබුණි. පසුගිය 2018 ජුනි මාසයේදී රතන හිමියන් පැවසුවේ මෛත්‍රිපාල සිරිසේන ජනපති වටා රොක්වී එතුමන් ගන්නා තීරණයට එකඟව කටයුතු කරන බවයි. එම ප්‍රකාශයෙන් මාසයක් ඉක්ම යාමටත් මත්තෙන් ජනාධිපතිවරයා ගැනද කළකිරී ජනාධිපති උපදේශක තනතුරෙන්ද ඉවත් වීමට රතන හිමියන් කටයුතු කර තිබේ.

පූජ්‍ය අතුරලියේ රතන හිමියනි. සැබවින්ම මාවිල්ආරුවට පවා වැඩම කරමින්, රසායනික පොහොර මාෆියාවට එරෙහිව අඛණ්ඩව හඬ නගමින් ඔබ වහන්සේ පෙන්වූ නිර්භීත භාවයට ඔබ වහන්සේගේ වයසින් අඩක් හෝ නැති මේ ලියුම්කරු ගරු කළේය. එහෙත් සමස්ත සිද්ධි දාමය සහ ඉතිහාසය දෙස බැලීමේදී අතුරලියේ රතන නම් හිමියන්ගේ ක්‍රියාකාරිත්වය තුළන් දිස්වන්නේ පරස්පර බවකි. බලය වෙනුවෙන් ඉනිමං තනා ගන්නා සෙයකි. අතුරලියේ රතන හිමියන් ජනතාව විසින් අතට දුන් ජාතිකත්වයේ ධජය එකිනෙකාගේ බල වුවමනාවන් වෙනුවෙන් පාවා දුන්නා ද ?.

‘අරාජිකත්වය කරා යන අපගේ දේශය හරිමගට ගැනීම උදෙසා ජාතික සම්මුතියක් ගොඩනැගීම’ වැනි නව සටන් පාඨ ඔස්සේ අගනුවර කේන්ද්‍ර කරගත් සමුළු සම්මන්ත්‍රණ පැවැත්වීමෙන්, තමන් විසින්ම දෝලාවේ තබා මහත් හරසරින් බලයට ගෙනා වත්මන් පාලකයන්ව විවේචනය කරමින් මහජනයාගේ අධ්‍යාත්මයට පිළිතුරු දීමට රතන හිමියන්ට හැකි වේවි ද?